V CERTAME MULLERES DE LEMOS: ENTREGA DO CONTO E VISIONADO

    As bibliotecas escolares dos centros públicos e concertados da Comarca de Lemos, participan no Certame Mulleres de Lemos organizado polo noso colectivo coa finalidade de dar a coñecer e promover figuras femininas relevantes na historia das Terras de Lemos.

    O V Certame Mulleres de Lemos estivo dedicado a Genoveva González Prieto  unha mestra do século XX do concello de Bóveda comprometida coa ensinanza na Galiza rural.

     Unha das actividades deste certame é o obradoiro que se desenvolve en colaboración co CIM (Centro de Información á Muller) de Monforte de Lemos e que consta nun traballo de reflexión sobre a vida desta mestra e a época á que pertence; e a posterior elaboración dun libro coas ilustracións feitas por alumnos de todos os centros públicos e concertados da Comarca de Lemos.

   Hoxe o Centro de Información á Muller de Monforte de Lemos fixo entrega de varios exemplares do libro resultante Genoveva González Prieto. Unha muller para o 8 de marzo ás Bibliotecas Públicas Municipais e ao alumnado dos centros participantes no obradoiro

 

    Ademais de recoller o libro, puidemos ver a proxección do conto coa voz en off da xornalista Manola Porto.

  

    Desde o Colectivo queremos agradecer a colaboración do CIM en cada convocatoria deste certame así como o traballo que leva a cabo para facer posible a publicación en papel do conto.

   Tamén queremos facer un agradecemento a Manola Porto por colaborar neste proxecto coa súa voz.

DÍA DA BIBLIOTECA - 2018

    Por sexto ano, o noso colectivo ven de organizar un xantar de confraternidade para conmemorar o Día da Biblioteca que se celebra o 24 de outubro; no que nos reunimos persoas de todos os sectores relacionados coa cultura, a lectura e a educación da nosa comarca.

    Nesta ocasión a reunión tivo lugar no Concello de Bóveda, por iso, comezamos esta xuntanza escoitando a Miriam Palmón, bibliotecaria do Concello anfitrión e a Cristina Juíz López  Concelleira de Cultura para darnos a benvida ao Colectivo e a todos os asistentes.

    Antes de xantar tamén puidemos escoitar na voz de Mónica, bibliotecaria do Saviñao, o texto co que a escritora do mesmo concello, Alicia Fernández, nos agasallou con motivo desta celebración.

     E como recordo para os participantes nesta xuntanza, editamos un marcapáxinas co texto co que o ano pasado nos agasallou Ramón Sandoval, un texto que podedes ler aquí e que fala da súa relación persoal coa lectura e cos libros.

    Despois de xantar, centrámonos no V Certame Mulleres de Lemos. Unha muller para o 8 de marzo adicado a Genoveva González Prieto.

   Para isto, da man do Centro de Información á Muller, fixemos un visionado do conto baseado na súa vida escrito por Mirian Palmón Díaz e ilustrado polo alumnado dos centros de Primaria da Comarca.

    Despois desta fermosa proxección, membros do colectivo fixeron entrega dos premios correspondentes ao Certame Mulleres de Lemos:

    1º PREMIO BANDA DESEÑADA: para Samanta López Vázquez e Celine Varela Zher (quen non puido acompañarnos no xantar) pola atmosfera poética que a impregna e que a través dun debuxo, que en ocasións se achega case á abstracción, consegue ofrecer unha narrativa visual moi interesante. Trátase dun debuxo maduro no que se xoga co uso da perspectiva e dos distintos planos para lograr cambios de ritmo que conseguen acrecentar o interese e a atención pola historia.

    ACCÉSIT  BANDA  DESEÑADA para Víctor Domínguez polo gran coidado no seu acabado e presentación, así como o traballo, a limpeza das liñas e a personalidade do debuxo.

    CATEGORÍA DIVULGACIÓN para Julio González Puente polo seu traballo A escola de Genoveva no que de forma autobiográfica relata a importancia desta mestra na súa educación.

   Con esta entrega de premios damos por rematado o V Certame e adiantamos que a VI edición terá como protagonista a unha muller do Concello de Ferreira de Pantón

   O acto finalizou cunhas verbas de José Manuel Arias López, alcalde de Bóveda, concello anfitrión nesta edición.

     Desde o colectivo queremos facer os seguintes agradecementos:

- a Alicia Fernández polo seu texto,

- ao xurado do certame pola súa colaboración: Ángel Arnaiz, Ana Santiso e Marina Doutón.

- ao CIM por facer posible o obradoiro Unha muller para o 8 de marzo e o visionado do conto durante este xantar

- a Manola Porto por prestar a súa voz,

- ás autoridades que nos acompañaron e

- aos concellos participantes:  A Pobra do Brollón, Monforte, O Saviñao, Sober e especialmente ao noso anfitrión o Concello de Bóveda.

FELIZ  DÍA  DA  BIBLIOTECA!!

 

 

 

 

   

 

 

V CERTAME DE DIVULGACIÓN MULLERES DE LEMOS

   Julio González Puente foi o gañador da  modalidade de divulgación do V Certame Mulleres de Lemos deste ano.

   O seu texto autobiográfico recorda con cariño a figura da mestra Genoveva González Prieto. Mostra a súa perspectiva como alumno e fala do que as súas ensinanzas supuxeron para aquel neno.

   Podes ler este traballo seguindo o enlace:

A  ESCOLA  DE  GENOVEVA

CONMEMORACIÓN DÍA DA BIBLIOTECA NA PRENSA

O Xornal de Lemos publica hoxe a información relativa á conmemoración do Día da Biblioteca.

xornaldelemos.gal 12/10/2018

ACCEDER  Á  PUBLICACIÓN

DÍA DA BIBLIOTECA 2018 - XANTAR DE CONFRATERNIDADE

    Para conmemorar o Día da biblioteca, desde o colectivo organizamos por sexto ano un xantar de confraternidade para reivindicar a importancia do papel das Bibliotecas como difusoras de cultura, formadoras de lectores, lugar de encontro e centros de información e recursos.

     Durante o xantar farase entrega dos premios do V Certame Mulleres de Lemos: Genoveva González Prieto. Unha muller para o 8 de marzo e presentarase a sexta edición do mesmo.

CONVOCATORIA V CERTAME MULLERES DE LEMOS

CERTAME   MULLERES   DE   LEMOS 

GENOVEVA GONZÁLEZ PRIETO.  UN  HA  MULLER  PARA  O  8  DE  MARZO 

   O Colectivo Lemos Le para conmemorar o Día da Muller que se celebra o 8 de marzo; organiza por quinto ano o Certame Mulleres de Lemos coa finalidade de dar a coñecer e promover as figuras femininas relevantes na historia das Terras de Lemos. 

   O Certame deste ano estará dedicado a Genoveva González Prieto unha mestra do Concello de Bóveda do século XX.  Propoñemos a esta muller polo seu compromiso coa ensinanza na Galiza rural. 

   As actividades que levaremos a cabo serán as seguintes: 

- O obradoiro “Genoveva González Prieto. Unha muller para o 8 de marzo” nos centros educativos públicos e concertados da nosa comarca. Esta actividade desenvolverase en colaboración co CIM (Centro de Información á Muller) de Monforte de Lemos e constará por unha banda, nun traballo de reflexión sobre a vida dunha mestra no século XX e, por outra banda, na elaboración dun libro que plasme en imaxes esta reflexión a través da súa vida. 

- V Certame Mulleres de Lemos modalidade Banda Deseñada. Para Secundaria e Bacharelato na que os participantes terán que elaborar un traballo  artístico e creativo que plasme a historia de Genoveva González (extensión mínima de 2 páxinas). 

- V Certame Mulleres de Lemos modalidade Divulgación. Esta modalidade está destinada a maiores de 18 anos que en calquera xénero literario presenten un traballo sobre a protagonista do certame (extensión de 10 a 25 páxinas a dobre espazo, tamaño de letra 12).

BASES  DO  CERTAME

BASES V CERTAME MULLERES DE LEMOS: GENOVEVA GONZÁLEZ PRIETO

        O Colectivo Lemos Le formado polas Bibliotecas Públicas Municipais de A Pobra do Brollón, Bóveda, O Saviñao e Sober e as bibliotecas escolares e Equipos de Dinamización e Normalización Lingüística do CEIP A Gándara, CEIP A Pobra do Brollón, Colexio Novo, CEIP Monte Baliño, CEIP Virxe do Carme, IES Daviña Rey, IES Río Cabe e IES A Pinguela; convoca a quinta edición do Certame de Divulgación Mulleres de Lemos coa finalidade de dar a coñecer e promover as figuras femininas relevantes na historia das Terras de Lemos.      

    Cada ano escóllese a figura dunha muller que fora relevante na historia das nosas terras; que nacera, vivira ou morrera na comarca, ou cuxa vida estivera moi relacionada con ela. Intentarase que cada convocatoria sexa dedicada a unha muller dunha localidade diferente.   

   Este certame rexerase polas seguintes bases: 

Primeira.- O certame deste ano versará sobre a figura de Genoveva González Prieto. 

Segunda.- Establécense 2 modalidades:
a. Banda deseñada para participantes de Secundaria e Bacharelato, e
b. Traballo de divulgación en calquera xénero literario para participantes a partir de 18 anos. 

Terceira.- Poderá concorrer a este certame calquera persoa que presente o seu traballo en lingua galega. Só se poderá presentar un traballo por persoa. 

Cuarta.- Os traballos presentados ademais de seren inéditos e totalmente orixinais, non poderán ter sido publicados ou divulgados en todo ou en parte por calquera medio físico ou electrónico. Os traballos presentados deberán aterse á: 

a. Extensión mínima de 2 páxinas para Banda deseñada
b. Extensión mínima de 5 páxinas para Traballo de divulgación, en tamaño de folio DIN A4 mecanografados por unha soa cara, a dobre espazo e tamaño de letra 12. 

Quinta.- Cada un dos traballos presentarase nunha copia en papel e nunha copia en formato dixital (tiff, jpg, doc ou pdf). Non se admitirán manuscritos do Traballo de divulgación. 

Sexta.- O prazo de presentación rematará o 15 de outubro. Os traballos serán presentados en calquera biblioteca municipal ou escolar dos centros educativos da comarca de Lemos integrados no colectivo Lemos Le. 

Sétima.- Os traballos presentaranse nun sobre pechado, identificados por un lema ou título e asinados cun pseudónimo. Noutro sobre en cuxo exterior figure o pseudónimo, incluirase unha folla co nome, apelidos e NIF, os enderezos postal e electrónico e os teléfonos de contacto da persoa autora do traballo de xeito que lle facilite á organización pórse en contacto con ela. 

    As persoas menores de idade deberán achegar a autorización dunha persoa maior de idade que exerza como representante legal (ANEXO I).

    No caso de remitirse as obras por correo postal a calquera das bibliotecas indicadas na base sexta ou por e-mail á dirección do colectivo (lemosle24@gmail.com), indicarase claramente “para participar no Certame de Divulgación Mulleres de Lemos”. 

Oitava.- O xurado estará formado por 3 persoas entendidas na materia. O premio único outorgarase por maioría simple de votos. Actuará como secretario/a do xurado con voz pero sen voto unha persoa designada polo colectivo Lemos Le. 

Novena.- Calquera incidencia ocasionada pola interpretación destas bases será solucionada pola maioría simple dos membros do xurado. A decisión do xurado, que será inapelable, darase a coñecer ó longo do mes de outubro; mes da biblioteca. 

Décima.- Concederase un único premio en cada categoría, segundo o criterio do Xurado. O xurado poderá declarar deserta algunha das categorías ou nomear un accésit por categoría se a calidade dos traballos presentados fai que así o estime oportuno.

Os premios consistirán en: diploma, 1 lote de libros, 1 lote de produtos da Ribeira Sacra e unha peza de artesanía local conmemorativa do certame. 

Undécima.- A entrega do premio terá lugar nun acto público que se celebrará arredor do día 24 de outubro, Día das Bibliotecas. 

Duodécima.- As obras gañadoras quedarán en propiedade do Colectivo Lemos Le. Os orixinais non premiados poderanse recuperar con cargo ás persoas autoras concorrentes, pasados 15 días da data de entrega de premios. Os orixinais que non fosen retirados neste prazo destruiranse. 

Decimoterceira.- O Colectivo Lemos Le ten a potestade de publicar unha antoloxía coas mellores obras presentadas ó concurso, para o cal, cada participante polo mero feito de se presentar, concede autorización tácita ó colectivo para a publicación do seu orixinal. 

Decimocuarta.- A participación neste certame supón a completa aceptación das presentes bases e máis das decisións do xurado que se designe.

ANEXO I

Monforte de Lemos, 8 de marzo de 2018