I ROMARÍA DAS LETRAS GALEGAS

   O día 15 de maio celebramos en Sober a I Romaría das Letras organizada polo noso Colectivo LEMOSLE, que como sabedes, está formado por bibliotecas escolares da Comarca, BPM, librarías e persoas vencelladas ao ámbito da lectura da comarca de Lemos. 

 

    Nesta xornada de convivencia participaron 8 centros educativos de Primaria (CEIP Pobra de Brollón, CEIP A Gándara, CEIP Plurilingüe de Monforte, CEIP de Oural, CEIP de Sober, CEIP Rosalía de Castro de Bóveda e CEIP Monte Baliño de Pantón) o IES Daviña Rey de Monforte de Lemos e usuarias da Biblioteca Pública Municipal do noso Concello xuntándose así máis de 300 personas no colexio de Sober xa que o mal tempo decidiu ser partícipe tamén desta xornada e non nos deixou celebrala na carballeira ao aire libre como estaba previsto.

 

   Durante o acto principal os diferentes colexios fixeron propostas moi diversas para conmemorar a nosa lingua e a Begoña Caamaño: regueifas, maios, cancións tradicionais, poesía, obradoiros, murais... e todo isto amenizado por un grupo de música tradicional formado por alumnado do IES Daviña Rey que terminou de darlle o toque festeiro a esta xuntanza.

   

     Ao rematar o IES Daviña Rey repartiu chapas conmemorativas para todos os asistentes e fixemos unhas fotos cun fotocall dedicado á obra de Begoña Caamaño.

   

 

    A xornada finalizou cun xantar de confraternidade no pavillón do CEIP P. Virxe do Carme durante o que o alumnado do CEIP Monforte de Lemos, organizou o obradoiro sementando palabras no que os nenos e as nenas podían escribir a súa palabra favorita en galego.

 

 

OXALÁ  ESTA  SEXA  A  PRIMEIRA  DE  MOITAS  EDICIÓNS  PORQUE  A  LINGUA  GALEGA  MEDRA  CANDO  A  COMPARTIMOS,  CANDO  A  CELEBRAMOS  E  CANDO  A  VIVIMOS  XUNTOS!!

 

FELIZ  DÍA  DAS  LETRAS  GALEGAS!! 

 

GALERÍA  DE  IMAXES

 

L∃EMOS, novo selo de Agrasar Editores

 A libraría Agrasar deste colectivo acaba de lanzar L∃EMOS, un novo selo editorial co que pretenden abrirse a diversas temáticas e estilos literarios ampliando o seu alcance como editores.

MOITA  SORTE, COMPAÑEIROS!!

 

 

 https://xornaldelemos.gal/cultura/66208-66208/

A BIBLIOTECA SOCIAL

     O Servizo do Sistema de Bibliotecas, dependente da Secretaría Xeral de Cultura, organizou a III Xornada de Bibliotecas Públicas de Galicia 2021 o 25 de outubro, na Cidade da Cultura de Santiago de Compostela.

   Baixo o lema Biblioteca Social, trataron o papel das bibliotecas para a integración e cohesión social, especialmente en tres vertentes: a integración de persoas ou colectivos con especiais dificultades, o fomento das relacións interxeracionais e a participación cidadá.

  Mónica Carballo, a nosa compañeira bibliotecaria da BPM de O Saviñao, participou na Mesa de Experiencias A biblioteca participativa e aberta a todas as idades.

  Podedes ver a súa intervención a partir do minuto 1:33 na que fala de actividades realizadas na súa biblioteca e de actividades do noso Colectivo.

 

 

Visita do CEIP da Pobra do Brollón á BPM do Saviñao

     O día 4 de outubro a Biblioteca Pública Municipal do Saviñao recibiu a visita duns magníficos alumnos do CEIP da Pobra do Brollón.

     Aproveitando que os máis maiores facían un tramo do Camiño de Inverno nas proximidades, os máis pequenos visitaron a biblioteca e coñeceron tamén un pouco o que é a Ribeira Sacra.

     Despois desta excursión a través das paredes da biblioteca, sentáreonse para unha sesión de contos. Nela, viron algúns dos contos que foron prohibidos hai uns anos en Venecia (Italia) e intentaron descobrir por que alguén decidiu que os había que prohibir. O certo é que non atoparon ningunha razón lóxica; a opinión maioritaria foi que eran unhas historias moi bonitas.

Escoitamos varios contos, algúns dos cales foron prohibidos:
A toupiña que quería saber quen lle fixera aquilo na cabeza,
A cousa que máis doe do mundo, Orellas de bolboreta,
Nadarín, La tortilla corredora,...

     Como eran moi lectores, algún dos contos xa os coñecían pero quixeron volvelos escoitar. Tamén se lles fixeron poucos, xa que pediron "máis", así que escolleron algún dos que hai na Casiña dos Ratos, que non foi prohibido en ningún sitio (que saibamos).

Cadaquén fai un debuxo inspirado nos contos que escoitamos.

     Rematamos facendo cadaquén un debuxo do conto que máis lle gustou. Os debuxos decoran a parede do Rincón dos contos da Sala Infantil da biblioteca.

Amosando os marabillosos debuxos que decoran agora
a Sala Infantil da Biblioteca Municipal do Saviñao

O tempo non deu para máis, pero na Biblioteca do Saviñao agárdanvos de novo.

Grazas pola vosa visita!

FEIRA DO LIBRO DE MONFORTE - 2017

    A Feira do Libro de Monforte deste ano contou co noso colectivo para facer unha exposición das actividades que levamos feito en relación co fomento do libro e da lectura ao longo dos 5 anos de andaina.

   A preparación desta exposición levounos a reflexionar sobre o traballo realizado e podemos dicir que estamos satisfeitos con el. Claro que aínda hai moitas cousas que se poden mellorar pero pensamos que estamos no bo camiño.

    Desde aquí, queremos agradecerlle á organización desta Feira do Libro de Monforte que contase con nós para esta edición xa que supón un recoñecemento ao traballo que facemos.

XORNADA ESCORNABÓTICA entre bibliotecas Lemos Le

    O Colectivo Lemos Le, organizou unha xornada escornabótica entre bibliotecas escolares da Comarca de Lemos.

    A Biblioteca do CEIP Plurilingüe Virxe do Carme, aportounos as propostas didácticas elaboradas dentro do proxecto piloto da biblioteca para animar aos demais centros a facer escornabóticas as súas bibliotecas.

XORNADA ESCORNABÓTICA

   O luns día 29 de maio ás 18:00 horas, celebrarase unha xornada escornabótica para as persoas interesadas en asistir e coñecer máis sobre estes pequenos robots deseñados dentro dun proxecto de Hardware libre.

   Os escornabots están a formar parte das bibliotecas para ampliar as linguaxes presentes nelas, promover a linguaxe de programación, a expresión oral, a alfabetización múltiple, o razoamento lóxico, a aprendizaxe manipultaiva, o xogo, a investigación e o traballo colaborativo.

INTERCAMBIO DE LIBROS ENTRE PARTICULARES NO MERCADO

   Durante o Mercado das Letras e das Flores, que tivo lugar os días 16 e 17 de Maio; os particulares que trouxeron libros ás nosas bibliotecas, disfrutaron deste espazo para escoller os novos libros que ían a levar.

    O noso espazo estivo moi animado e nel, tanto nenos como adultos, puideron desfrutar dos libros.

MERCADO DAS LETRAS E FLORES

LEMOS LE. BIBLIOTECAS E LIBRARÍAS UNIDAS POR E PARA A LECTURA

    A Consellería de Cultura, Educación e Ordenación Universitaria publica o nº 68 da súa Revista Galega do ensino, EDUGA. 

    Entre as diferentes seccións, a de BIBLIOTECAS ESCOLARES acolle un bo número de artigos que permiten coñecer experiencias en distintos centros, sexa sobre o desenvolvemento de proxectos de carácter interdisciplinar ou sobre actividades máis centradas no fomento da lectura; outros artigos constitúen un percorrido polo conxunto de actividades que deseñan, cumprindo así o seu papel de centros de lectura, información e aprendizaxe...  

   Un destes artigos está adicado ao noso colectivo. Está asinado polas coordinadoras das bibliotecas escolares de A Gándara e Sober e trata das iniciativas levadas a cabo e do traballo realizado polo colectivo Lemos Le para unificar esforzos no impulso do mundo dos libros e da lectura.

   Podes ler o artigo premendo no seguinte enlace:

Lemos Le. Bibliotecas escolares unidas por e para a lectura.

LEMOS LE NOS MERCADOS DE MONFORTE

    O Concello de Monforte organiza cada fin de semana un mercado temático. No Días das Letras Galegas o espazo do mercado estivo dedicado ás letras e as flores; e como non podía ser doutro modo, este mercado acolleu diversas actividades propostas polo noso colectivo.

    Pola mañá, combinando actuacións musicais con lendas tradicionais da nosa comarca actuaron Os Parentes e Antón Valcarce.

    Pola tarde foi tempo para as bibliotecas escolares a través do "micrófono aberto" no que o público que asisitiu  a este mercado puido ver distintas formas de narración oral que traballamos nos colexios ca que alumnado e profesores participaron contando e representando contos como monologuistas e con representacións teatrais. Tamén levamos ao mercado o Kamishibai.