CONVOCATORIA IV CERTAME MULLERES DE LEMOS

CERTAME MULLERES DE LEMOS

BALBINA LÓPEZ SOMOZA. UNHA MULLER PARA O 8 DE MARZO

O Colectivo Lemos Le para conmemorar o Día da Muller que se celebra o 8 de marzo; organiza por cuarto ano o Certame Mulleres de Lemos coa finalidade de dar a coñecer e promover as figuras femininas relevantes na historia das Terras de Lemos.

O Certame deste ano estará dedicado a Balbina López Somoza unha farmacéutica de O Saviñao do século XX. Propoñemos a esta muller como unha pioneira da ciencia na nosa comarca.

As actividades que levaremos a cabo serán as seguintes:

• O obradoiro “Balbina López Somoza. Unha muller para o 8 de marzo” nos centros educativos públicos e concertados da nosa comarca. Esta actividade desenvolverase en colaboración co CIM (Centro de Información á Muller) de Monforte de Lemos e constará por unha banda, nun traballo de reflexión sobre a vida dunha precursora científica no século XX e, por outra banda, na elaboración dun libro que plasme en imaxes esta reflexión a través da súa vida.
• IV Certame Mulleres de Lemos modalidade Banda Deseñada. Para Secundaria e Bacharelato (de 12 a 18 anos) na que os participantes terán que elaborar un traballo artístico e creativo que plasme a historia de Balbina López (extensión de 2 a 4 páxinas).
• IV Certame Mulleres de Lemos modalidade Divulgación. Esta modalidade está destinada a maiores de 18 anos que en calquera xénero literario presenten un traballo sobre a protagonista do certame (extensión de 10 a 25 páxinas a dobre espazo, tamaño de letra 12).