jueves, 18 de diciembre de 2014

RECOMENDACIÓNS LECTORAS PARA O NADAL - 2014

   Outro nadal máis queremos compartir as nosas recomendacións lectoras para esta época do ano; así que le tamén en Nadal.




miércoles, 17 de diciembre de 2014

PUBLICACIÓN DO CONTO INÉS DE CASTRO. UNHA MULLER PARA O 8 DE MARZO

    O pasado curso; organizamos desde o Colectivo coa colaboración do CIM de Monforte o proxecto Inés de Castro. Unha muller para o 8 de marzo no que cada un dos trece centros participantes elaborou unha ilustración representativa dunha etapa da vida de Inés de Castro.
  
    Como resultado do traballo no que os nenos e nenas mostraron gran creatividade ilustrando a historia desta muller; vimos de asistir á presentación do conto titulado como o proxecto: Inés de Castro. Unha muller para o 8 de marzo. 

     O CIM foi o encargado de maquetar o conto e xestionar a subvención do Fondo Social Europeo que permitiu  a súa publicación; polo que desde o colectio queremos agradecer públicamente a súa xestión. 

     Ana Casal, Concelleira de Igualdade de Monforte, como representante do CIM foi a encargada de entregar aos alumnos e alumnas dos diferentes centros e as bibliotecarias das Bibliotecas públicas municipais varios exemplares dos libros editados.

Podes ver o libro premendo na imaxe:


LEMOS LE. BIBLIOTECAS E LIBRARÍAS UNIDAS POR E PARA A LECTURA

    A Consellería de Cultura, Educación e Ordenación Universitaria publica o nº 68 da súa Revista Galega do ensino, EDUGA

    Entre as diferentes seccións, a de BIBLIOTECAS ESCOLARES acolle un bo número de artigos que permiten coñecer experiencias en distintos centros, sexa sobre o desenvolvemento de proxectos de carácter interdisciplinar ou sobre actividades máis centradas no fomento da lectura; outros artigos constitúen un percorrido polo conxunto de actividades que deseñan, cumprindo así o seu papel de centros de lectura, información e aprendizaxe...  

   Un destes artigos está adicado ao noso colectivo. Está asinado polas coordinadoras das bibliotecas escolares de A Gándara e Sober e trata das iniciativas levadas a cabo e do traballo realizado polo colectivo Lemos Le para unificar esforzos no impulso do mundo dos libros e da lectura.

   Podes ler o artigo premendo no seguinte enlace:

Lemos Le. Bibliotecas escolares unidas por e para a lectura.

 

martes, 2 de diciembre de 2014

REUNIÓN DO COLECTIVO 9/12/2014

LUGAR: IES Daviña Rey

HORA: 20:00 horas

ORDE DO DÍA:
1) Recomendacións lectoras de Nadal
2) Certame Mulleres de Lemos
3) Actividades nos centro arredor de María Castaña
4) Rogos e preguntas

jueves, 23 de octubre de 2014

OLGA NOVO: UNIVERSO DE LIBROS, UNIVERSO DE VACAS

UNIVERSO DE LIBROS, UNIVERSO DE VACAS

    O célebre escritor arxentino Jorge Luis Borges imaxinou o Universo baixo a forma dunha biblioteca. E soñou tamén cun libro de area que non tiña fin. Eu sempre soñei coa inmensa bibioteca de Alexandría que chegou a conter milleiros de papiros que tiñan, enroledado, todo o saber da Antigüidade.
    
    Pero o meu universo da infancia non tiña libros. O meu universo da infancia tiña vacas. Tamén ovellas, coellos, cans... pero sobre todo vacas. O meu cuarto estaba xusto enriba da corte e escoitaba nas frías noites do inverno, tapada ata os olliños, o son das cadeas ás que estaban presas as vacas e oía os seus bufidos, a súa respiración e as queixas daquelas que estaban a piques de parir.

   Adormecía co seu alento e espertaba tamén co muar madrugador dalgunha delas que xa pedía que a munguiran. O caso é que aquel meu cuarto, xa na mocidade, empezou a albergar algúns libros, exemplares de poesía, libros de historia, manuais de feminismo, biografías, novelas de Tolstoi e Flaubert, humildes edicións baratas dos clásicos, libros mercados cos aforriños e libros regalados con xenerosidade, xoia do ouro do pracer máis prezado; e a inmensa biblioteca entraba no meu cuaro polos soños. Eu acariñaba aqueles libros coma se fosen xentes queridas e debruzada na madrugada sobre as súas páxinas viaxei polo mundo sen saír da pequena aldea, do pequeno cuarto, da pequena cama desde onde oía respirar ás vacas.

   E así foi como aqueles libros do meu cuarto recibiron o profundo perfume das vacas que vivían xusto debaixo e o tecido de papel impregnouse para sempre daquel olor. Aqueles libros viaxaron en maletas a Santiago, á Coruña e mesmo algúns deles viñeron canda min vivir sete anos na Bretaña. Mais ningunha viaxe, ningún lugar, foi capaz de lle arrebatar o perfume: nin o mar da Coruña nin a marusía bretoa se impuxeron ao olor da herba e do alento das vacas.

    Por iso o meu universo de libros foi e será sempre un universo de vacas: a alta cultura leva para min o perfume labrego, o olor potente e profundo da máis fonda sabiduría do pobo.

Olga Novo

Agradecemos a Olga Novo este texto, agasallo para o Colectivo Lemos Le no Día da Biblioteca - 2014
 

CEA DE CONMEMORACIÓN DO DÍA DA BIBLIOTECA - 2014


Por segundo ano o noso colectivo celebrou unha cea para conmemorar o Día da Biblioteca.
   Ademais nesta ocasión, fíxose entrega dos premios do I CERTAME MULLERES DE LEMOS: INÉS DE CASTRO. UNHA MULLER PARA O 8 DE MARZO.

    A xornalista Manola Porto, como portavoz do xurado deste certame; foi a encargada da lectura da Acta dando a coñecer así os gañadores os cales recibiron os correspondentes premio da man dos alcades de Sober, Monforte de Lemos e A Pobra de Brollón.
 
    Os premiados foron:

Xosé Martínez Rodríguez. 1º premio Certame Divulgación polo seu traballo Pequena historia dunha raíña de Lemos

- Víctor Domínguez Fernández. 1º premio Banda deseñada

- Cristina Fernández Silvosa  e María Armesto Luaces. Accésit Banda Deseñada.

   Ao remate do acto, Antón Vidal, representante do colectivo leu un fermoso tecto que a escritora Olga Novo nos adicou para este evento.

   Tamén foi presentada II Edición do Certame Mulleres de Lemos adicado nesta ocasión a María Castaña, a líder da revolta medieval que se produciu en Cererixa (A Pobra de Brollón) coa intención de seguir potenciando a investigación e difusión da cultura na nosa comarca.


  O colectivo quedou moi contento con esta cea de conmemotación que como na primeira ce acelbrada contou tamén contou con moita asistencia e foi recollida na prensa da comarca.


martes, 21 de octubre de 2014

INÉS DE CASTRO. UNHA MULLER PARA O 8 DE MARZO - Centros de Secundaria e Adultos

     O I Certame Mulleres de Lemos, convocou a modalidade de Banda Deseñada para a poboación de 12 a 18 anos e a modalidade Divulgación para maiores de 18 anos.

    Coa modalidade de banda deseñada, esta convocatoria tratou de de implicar ao alumnado de Secundaria e Bacherelato nunha actividade multidisciplinar na que tiveron que facer un traballo artístico e creativo para o que precisaron unha documentación previa, a adaptación da historia medieval ao formato de banda deseñada e a realización da BD para presentala ao certame.

      Esta iniciativa tivo unha boa aceptación entre a poboación escolar e entre o profesorado de plástica o que deu como resultado traballos de alta calidade motivo polo cal habilitáronse dous accésits ademais do premio principal. 

       Os premiados foron:
 
- Víctor Domínguez Fernández. 1º premio

- Cristina Fernández Silvosa  e María Armesto Luaces. Accésit


     A modalidade de divulgación,  canalizouse a través das Bibliotecas Públicas Municipais. O traballo de divulgación pode presentarse en calquera xénero literario.

   O traballo premiado foi a narración de Xosé Martínez Rodríguez: Pequena historia dunha raíña de Lemos
 
    Para a seleción dos traballos en ambas modalidades contamos cun bo xurado formado por xornalistas, historiadores e artistas da comarca aos que lles queremos agradecer a súa colaboración.
·         Ángel Arnaiz González
·         Sara Álvarez Otero
·         Manola Porto Arias
                              ·         Humberto Loureiro Argullós

     Tamén agradecemos aos Concellos de A Pobra de Brollón, Bóveda, Monforte de Lemos, O Saviñao e Sober así como ao Centro do Viño, A Troula e ás librerías Agrasar e Fénix a súa doazón dos premios.


miércoles, 15 de octubre de 2014

NOTA DE PRENSA: CEA DE CONFRATERNIDADE PARA O DÍA DA BIBLIOTECA



O Colectivo Lemos Le para conmemorar o Día da Biblioteca que se celebra o 24 de outubro; organiza por segundo ano unha cea de confraternidade para todos os sectores relacionados coa cultura, a lectura e a educación.

A cea está aberta a todas as persoas interesadas que deberán recoller as súas entradas no Museo do Viño ata o día 22 de outubro incluído a un prezo de 20 €.

Con este acto queremos reivindicar a importancia do papel das Bibliotecas como difusoras de cultura, formadoras de lectores, lugar de encontro e centros de información e recursos.

Durante a mesma farase entrega dos premios do I Certame de Divulgación Mulleres de Lemos: Inés de Castro correspondentes aos seguintes participantes:
-          1º Premio divulgación: Xosé Martínez Rodríguez
-          1º Premio banda deseñada: Víctor Rodríguez Fernández (IES Daviña Rey)
-          Accésit categoría banda deseñada:
Cristina Fernández Silvosa (IES Daviña Rey)
María Armesto Lucas (IES Daviña Rey)

Ademais convocarase oficialmente a segunda edición dedicada este ano á figura de María Castaña.

Desde o colectivo queremos facer os seguintes agradecementos:
-          Ao CIM (Centro de Información á Muller) polo desenvolvemento dos obradoiros  Inés de Castro: Unha muller para o 8 de marzo;  facendo fincapé na publicación do libro do mesmo título elaborado polos nenos dos centros da comarca de Lemos.

-          Aos Concellos de A Pobra de Brollón, Bóveda, Monforte de Lemos, O Saviñao e Sober así como ao Centro do Viño, A Troula e ás librerías Agrasar e Fénix pola doazón dos premios.

-          Ao xurado que desinteresadamente colaborou neste certame:
·         Ángel Arnaiz González
·         Sara Álvarez Otero
·         Manola Porto Arias
·         Humberto Loureiro Argullós

miércoles, 8 de octubre de 2014

REUNIÓN DO COLECTIVO 15/10/2014

LUGAR: A Troula

HORA: 20:00 horas

ORDE DO DÍA:
1) Organización dos premio do I Certame Mulleres de Lemos
2) Día da Biblioteca: cea, esposición de traballos, impresión de adhesivos, deseño do cartel e outros
3) Redacción da nota de prensa sobre o Día da biblioteca
4) Rogos e preguntas

miércoles, 24 de septiembre de 2014

CONVOCATORIA DE REUNIÓN 1/10/2014

LUGAR: A Troula

HORA: 20:00 horas

ORDE DO DÍA:
1) Premios I Certame Mulleres de Lemos: agasallos recadados.
2) Día da Biblioteca: data, lugar, menú, organización e outros.
3) Exposición  dos traballos premiados
4) Rogos e preguntas

miércoles, 17 de septiembre de 2014

REUNIÓN DO COLECTIVO 24/9/2014

LUGAR: A Troula

HORA: 20:00 horas

ORDE DO DÍA:
1) Exposición de traballos: Inés de Castro
2) posibles colaboradores cos premios do I Certame Mulleres de Lemos
3) Invitacións á celebración do Día da Biblioteca: CIM, xurado, escritores, centros de ensino e outros.
4) Nova convocatoria do Certame
5) Rogos e preguntas

jueves, 19 de junio de 2014

lunes, 26 de mayo de 2014

ROTEIRO ARTÍSTICO, HISTÓRICO E LITERARIO POR MONFORTE CON MANUEL MARÍA


    O colectivo organizou un roteiro artístico – histórico – literario sobre a figura do escritor Manuel María en resposta ao ofrecemento que se nos fixo desde a Concellería de Cultura

    Tratouse dunha ruta guiada polo autor desta iniciativa, Xosé Martínez, visitando a Exposición “Por Monforte con Manuel María” e paseando pola cidade do Cabe da man da magnífica guía poética que é o “Cancioneiro de Monforte de Lemos” deste autor con paradas para a lectura dalgúns destes poemas. 
 
   E para rematar o roteiro, fixemos unha ruta gastronómica por algúns dos bares que participan no certame de hostelería Cume Tapas.
 
    Neste roteiro participaron persoas de todos os ámbitos da comunidade educativa así como amigos das bibliotecas e clubs de lectura.