RECOMENDACIÓNS LECTORAS NADAL - 2019

RECOMENDACIÓNS  EN  PDF

DÍA DA BIBLIOTECA 2019

   Para conmemorar o Día da Biblioteca que se celebra o 24 de outubro; o noso colectivo ven de organizar unha cea de confraternidade na que nos reunimos persoas de todos os sectores relacionados coa cultura, a lectura e a educación da nosa comarca.

    Este ano a reunión tivo lugar no Concello de Ferreira de Pantón, e comezou cunha visita guiada ao Mosteiro de San Miguel de Eiré da man de Flora Enríquez; coa idea de achegarnos máis á muller á que se lle dedicaba este ano o Certame Mulleres de Lemos: Inés Fernández, abadesa de Eiré.

 

  Despois da visita, a xuntanza continuou na Rectoral de Castillón onde Cristina Domínguez Vázquez, Concelleira de Cultura deste concello, e Antón Vidal, representante do Colectivo, nos deron a benvida a todos os asistentes.

    Antes de cear tamén puidemos escoitar na voz de Flora Enríquez, o texto co que nos agasallou con motivo desta celebración. Un texto moi emotivo sobre o seu achegamento á biblioteca cando era pequena con especial mención a Milagritos, a bibliotecaria. (Enlace ao texto)

 

    Os participantes nesta xuntanza, levaron como recordo un marcapáxinas con este texto e outro co que o ano pasado nos agasallou Alicia Fernández.

 

    Despois de cear, centrámonos no VI Certame Mulleres de Lemos. Unha muller para o 8 de marzo adicado, como xa dixemos, a Inés Fernández, abadesa de Eiré.

   Para isto, da man do Centro de Información á Muller, fixemos un visionado do conto baseado na súa vida escrito por Francisco Javier González Díaz e ilustrado polo alumnado dos centros de Primaria da Comarca. 

 

  Despois desta fermosa proxección, membros do colectivo fixeron entrega dos premios correspondentes ao Certame Mulleres de Lemos:

1º PREMIO BANDA DESEÑADA

 Sara Rodríguez e Alicia Soto

 

ACCÉSITS BANDA DESEÑADA: 

Ximena  López

 

Zeltia Pérez, Claudia Pérez e Ari Valdés

1º PREMIO DIVULGACIÓN

Eugenia Sanmartín pola canción "Inés no penedo" que interpretou en directo

    O acto finalizou coa actuación desta cantante de fados que amenizou a velada e coa xa tradicional sesión de fotos que conmemora este día na que se representaba ás tres monxas que quedaron no convento e a Don Diego de Muros.

     Desde o colectivo queremos facer os seguintes agradecementos:

- as autoridades que nos acompañaron,

- a Flora Enríquez polo seu texto,

- a Francisco Javier González Díaz polo traballo de documentación sobre Inés Fernández, polo texto do conto e pola organización deste evento,

- ao xurado do certame pola súa colaboración: Anabel Álvarez, Anxo Rigueira e José Luis Ramos,

- ao CIM por facer posible o obradoiro Unha muller para o 8 de marzo e o visionado do conto durante este xantar,

- a Manola Porto por prestar a súa voz,

- ás entidades colaboradoras Panadería Tarrazo, adega Finca Míllara, Oca Augasantas, a Deputación de Lugo, Imprenta Chuzos, Librería Agrasar e Imprenta Fénix e as Concellos que tamén colaboraron: A Pobra do Brollón, Monforte, O Saviñao, Sober, Bóveda e especialmente ao noso anfitrión o Concello de Ferreira de Pantón.

GALERÍA  DE  IMAXES

FLORA ENRÍQUEZ: texto agasallo para o Colectivo Lemos Le no Día da Biblioteca 2019

MILAGRITOS

         Tiven o privilexio de nacer nunha vila que tiña biblioteca. Unha tarde da primavera de hai máis de cincuenta anos, o meu avó levoume a coñecela. Estaba situada  nun pazo no centro da parte máis vella da vila. Mira, dicía o meu avó, este é un edificio importante, é un pazo, ten máis de douscentos anos. A coñecida como a  Casa do Castro  era tan grande que, ademais da biblioteca, alí estaban o xulgado, as oficinas municipais e a nosa escola, a escola de nenas, e tamén acollía unha vivenda particular.

No traxecto dende a nosa casa, o meu avó non paraba de lembrarme que nas bibliotecas non se falaba, nin se cantaba, nin se podía saltar polas mesas. É coma na igrexa? Imos a unha misa?, preguntaba eu con certo temor. Non, pero hai que portarse ben. 

Subimos por unha escaleira que, co tempo, decateime de que era dunha gran suntuosidade, propia dunha casa fidalga, pero daquela apenas reparei nela. Eu  seguía coa   teima de que tiña que estar calada, moi caladiña. Case tiña medo!

Pero os meus temores desapareceron ó entrar. Había alí  outros nenos e nenas, algúns xa mozos, lendo, falando baixiño ou collendo libros dos estantes.  Todos  semellaban  tranquilos e entretidos, pero o que en verdade me tranquilizou foi o sorriso de Milagritos, a bibliotecaria, e a amabilidade coa que nos falaba. Explicounos a historia daquel lugar, ensinounos moitos libros, grandes e pequenos, con debuxos e con  mapas,  e o mellor de todo foi que me fixo un carné de socia. Considereime unha nena importante.

Era certo! Había que estar con respecto, aquel lugar  era case unha igrexa, era un templo onde se agachaban as historias que marcarían a nosa infancia, a nosa adolescencia e case toda a nosa vida. Aquiles, Ulises, o cabalo de Troia, os deuses de Grecia e Roma, a tumba de Tutankamon, os mouros que vivían nos castros, os tesouros incas... foron o centro dos meus soños, e os  doutros moitos nenos e nenas que, ó saírmos da escola, iamos sempre á biblioteca, onde Milagritos nos agardaba cun gran sorriso, e case sempre con algunha lambetada.

                                                                                 

      Flora Enríquez

Día da Biblioteca 2019

 

A PRENSA FAISE ECO DA NOSA CONMEMORACIÓN

 

ENLACE  AO  ARTIGO

Xoves 17/10/2019. (Minuto 100)

DÍA DA BIBLIOTECA 2019

Para conmemorar o Día da Biblioteca que se celebra o 24 de outubro; organiza por sétimo ano unha cea de confraternidade para todos os sectores relacionados coa cultura, a lectura e a educación. Nesta ocasión, acollerá o acto o Concello de Pantón xa que a homenaxeada deste ano é natural do mesmo.

Con esta conmemoración queremos reivindicar a importancia do papel das Bibliotecas como difusoras de cultura, formadoras de lectores, lugar de encontro e centros de información e recursos.

A cea será o día 26 de outubro na Rectoral de Castillón a partir das 21:30 horas, quen desexe asistir poderá recoller a súa entrada nas Bibliotecas Públicas Municipais de A Pobra de Brollón, Bóveda, Pantón, Saviñao e Sober ou nas bibliotecas escolares do colectivo, no IES Daviña Rey ou no propio restaurante ata o día 18 de outubro incluído a un prezo de 22 €. A cea contará coa actuación da cantante de fados e mornas Eugenia Sanmartín.

Xa que durante esta cea tamén se fará entrega dos premios do VI Certame de Divulgación Mulleres de Lemos: Inés Fernández, abadesa de Eiré. Unha muller para o 8 de marzo; as persoas que o desexen poderán participar nunha visita guiada á Igrexa de San Miguel de Eiré o mesmo día, ás 19:00 horas.

Este ano contaremos coa colaboración literaria de Flora Enríquez que nos agasallará cun texto para conmemorar o Día das Bibliotecas. A súa colaboración súmase á de outros autores da comarca de Lemos que participaron en pasadas edicións: Olga Novo, Manuel Veiga, Lois Diéguez, Ramón Sandoval, Xabier Quiroga e Alicia Fernández.

VI CERTAME MULLERES DE LEMOS: AMPLIACIÓN DE PRAZO

    Amplíase ao 15 DE OUTUBRO o prazo do VI Certame Mulleres de Lemos convocado por este colectivo coa finalidade de dar a coñecer e promover as figuras relevantes na historia das Terras de Lemos.

    Recordamos que o certame está dedicado a Inés Fernández, abadesa de eiré no século XV, como representante do poder das mulleres nos conventos de Galicia na época medieval xa que incluso chegou a enfrontarse ás normas ditadas polos Reis Católicos.

    As modalidades nas que se amplía o prazo son:

- BANDA DESEÑADA: para Secundaria e Bacharelato na que os participantes terán que elaborar un traballo artístico e creativo que plasme a historia de Inés Fernández (extensión mínima: 2 páxinas)

- DIVULGACIÓN: modalidade destinada a maiores de 18 anos que en calquera xénero literario presenten un traballo sobre a protagonista do Certame (extensión máxima 25 páxinas a dobre espazo, tamaño de letra 12)

•  BASES  DO  CERTAME

CONVOCATORIA DE REUNIÓN: 18/09/2019

LUGAR: BIBLIOTECA IES DAVIÑA REY

HORA: 20:00

ORDE DO DÍA:

1) Día da Biblioteca 2019: organización do xantar, deseño do cartel, puntos de lectura conmemorativos e elección do escritor convidado.

2) Certame Mulleres de Lemos: exposición de traballos premiados e premios.

3) Difusión da conmemoración: nota de prensa e distribución de carteis.

4) Rogos e preguntas

RECOMENDACIÓNS LECTORAS VERÁN 2019

CONVOCATORIA DE REUNIÓN: 5/6/2019

LUGAR: IES Daviña Rey

HORA: 20:00

ORDE DO DÍA:

1) Recomendacións lectoras verán 2019

2) Rogos e preguntas

V CERTAME MULLERES DE LEMOS: ENTREGA DO CONTO E VISIONADO

    As bibliotecas escolares dos centros públicos e concertados da Comarca de Lemos, participan no Certame Mulleres de Lemos organizado polo noso colectivo coa finalidade de dar a coñecer e promover figuras femininas relevantes na historia das Terras de Lemos.

    O V Certame Mulleres de Lemos estivo dedicado a Genoveva González Prieto  unha mestra do século XX do concello de Bóveda comprometida coa ensinanza na Galiza rural.

     Unha das actividades deste certame é o obradoiro que se desenvolve en colaboración co CIM (Centro de Información á Muller) de Monforte de Lemos e que consta nun traballo de reflexión sobre a vida desta mestra e a época á que pertence; e a posterior elaboración dun libro coas ilustracións feitas por alumnos de todos os centros públicos e concertados da Comarca de Lemos.

   Hoxe o Centro de Información á Muller de Monforte de Lemos fixo entrega de varios exemplares do libro resultante Genoveva González Prieto. Unha muller para o 8 de marzo ás Bibliotecas Públicas Municipais e ao alumnado dos centros participantes no obradoiro

 

    Ademais de recoller o libro, puidemos ver a proxección do conto coa voz en off da xornalista Manola Porto.

  

    Desde o Colectivo queremos agradecer a colaboración do CIM en cada convocatoria deste certame así como o traballo que leva a cabo para facer posible a publicación en papel do conto.

   Tamén queremos facer un agradecemento a Manola Porto por colaborar neste proxecto coa súa voz.

VI CERTAME MULLERES DE LEMOS. INÉS FERNÁNDEZ. ABADESA DE EIRÉ.

O Colectivo Lemos Le para conmemorar o Día da Muller que se celebra o 8 de marzo; organiza por sexto ano o Certame Mulleres de Lemos coa finalidade de dar a coñecer e promover as figuras femininas relevantes na historia das Terras de Lemos.

O Certame deste ano estará dedicado a unha muller do Concello de Pantón: Inés Fernández, abadesa de Eiré no século XV. Propoñemos a esta muller como representante do poder das mulleres nos conventos de Galicia na época medieval xa que incluso chegou a enfrontarse ás normas ditadas polos Reis Católicos.

 

As actividades que levaremos a cabo serán as seguintes:

• O obradoiro “Inés Fernández. Abadesa de Eiré. Unha muller para o 8 de marzo” nos centros educativos públicos e concertados da nosa comarca. Esta actividade desenvolverase en colaboración co CIM (Centro de Información á Muller) de Monforte de Lemos e constará por unha banda, nun traballo de reflexión sobre a súa vida e, por outra banda, na elaboración dun libro que plasme en imaxes esta reflexión.
• VI Certame Mulleres de Lemos modalidade Banda Deseñada. Para Secundaria e Bacharelato na que os participantes terán que elaborar un traballo artístico e creativo que plasme a historia de Inés Fernández (extensión mínima: 2 páxinas).
• VI Certame Mulleres de Lemos modalidade Divulgación. Esta modalidade está destinada a maiores de 18 anos que en calquera xénero literario presenten un traballo sobre a protagonista do certame (extensión de 10 a 25 páxinas a dobre espazo, tamaño de letra 12).
   BASES  DO  CERTAME

CONVOCATORIA DE REUNIÓN: 26/02/2019

LUGAR: BIBLIOTECA IES DAVIÑA REY

HORA: 20:00

ORDE DO DÍA:

1) Organización do V Certame Mulleres de Lemos adicado nesta edición a Inés Fernández, abadesa de Eiré no século XV como representante do poder das mulleres nos conventos de Galicia na época medieval: deseño do cartel, revisión das bases e difusión

2) Rogos e preguntas

CONVOCATORIA DE REUNIÓN: 12/02/2019

LUGAR: BIBLIOTECA IES DAVIÑA REY

HORA: 20:00

ORDE DO DÍA:

1) Certame Mulleres de Lemos 2019 (concello anfitrión Pantón): elección da muller á que se lle adicará esta edición do Certame.

2) Rogos e preguntas